Өзбекстан жараны газга болгон карызынан улам өзүн өзү өрттөдү

Өзбекстан жараны газга болгон карызынан улам өзүн өзү өрттөдү

01-чын куран, 2017-ж // //

30-мартта Өзбекстандын Наманган облусунун 47 жаштагы тургуну үстүнө бензин куюп, өзүнө өрт койду. Ал денесинин 100 пайызы күйүп ооруканага жеткирилген, бирок кечке жакын кайра жандандыруу бөлүмүндө каза болду. Коңшуларынын айтымдарында, ал бир  канча күн мурда көгүлтүр отунга болгон карызын доолап келген газ ишканасынын кызматкери менен чатакташып кеткен. «Ал өзүн сарайда өрттөгөн. Чуркап барган аялы өрттү өчүрүүгө аракет кылган, бирок жалын ага да жабышкан. Анан биз жетип барып балдары менен бирге араң өчүрдүк. Аны менен бирге ооруканага аялы да жеткирилди. Жубайынын далысы жана манжалары күйгөн. Учурда анын ден соолугуна эч кандай коркунуч жок», – деди коңшуларынын бири. Маалыматка караганда, өзүн өрттөгөн 47 жаштагы жаран түрдүү жумуштарда жалданып иштеп жүрчү. Анын артында төрт уулу жана бир кызы калды. Бул окуяга байланыштуу адам өлүмү фактысы боюнча «Өз жанын кыйууга чейин жеткирүү» беренесинин негизинде кылмыш иши козголду. Жергиликтүү бийликтин маалыматы боюнча, газ ишканасы каза болгон адамдын моюнуна 2 миллион сумдук (260 долларга жакын) карыз илген. Андан сырткары анын үйүндө газ насосу табылып, бул тууралуу прокуратурага кабарланган.
Булак: “Борбор Азия жаңылыктар кызматы”