«Ататүрк — Алатоо» университетинин аты өзгөрүп, ректору алмашты

Эми жаңы устав иштелип чыгып, Юстиция министрлигинен каттоодон өтөт.
Эл аралык «Ататүрк — Алатоо» университетинин аты «Ала-Тоо» болуп өзгөртүлдү. Бул тууралуу Sputnik Кыргызстан агенттигине «Сапат» билим берүү мекемесинин башкы директору Нурлан Кудайбердиев билдирди.
Маалыматка ылайык, Эл аралык «Ала-Тоо» университетинин түзүүчүлөр курамына КР Билим берүү жана илим министрлиги кирди. Эми жаңы устав иштелип чыгып, Юстиция министрлигинен каттоодон өтөт.
«Мындан сырткары, жетекчилигинде да өзгөрүлөр болуп окуу жайдын жетекчилиги алмашты. Ректор болуп педагогика илимдеринин доктору, билим берүү багытындагы бир нече мыйзамдардын автору жана Жогорку Кеңештин үч жолку чакырылышынын депутаты, ушул окуу жайда ректордун кеңешчиси болуп келген Жанкороз Каниметов дайындалды», — деди Кудайбердиев.
«Ала-Тоо» университети «Сапат» билим берүү мекемесинин курамына кирет. Эскерте кетсек, буга чейин эл аралык «Себат» билим берүү мекемесинин аты да «Сапат» деп өзгөртүлгөн.

Булак: sputnik.kg