Алмазбек Атамбаевдин жана башка саясий туткундардын тарапкерлери ачкачылык жарыялашты. Алар плакаттар менен Ак үйгө келишти.
Митингчилер Алмазбек Атамбаевге жана башка саясий туткундарга карата акыйкат чечим чыгарылышын жана соттор ачык болушун талап кылышууда.
Мындан тышкары, алар парламенттик шайлоону өз убагында өткөрүүнү талап кылышууда, анткени Жогорку Кеңештин алтынчы чакырылышына ишеним жок. «Бирок депутаттар дагы деле отурат. Бул саясий деңгээлге аянычтуу таасирин тийгизиши мүмкүн», – деп кошумчалашты митингчилер.



Аскер прокуратурасы Алмазбек Атамбаев шектүү катары каралып жаткан алты ишти кароодо. Экөөсү боюнча – кримавторитет Азиз Батукаевдин мыйзамсыз бошотулушу жана 2019-жылдын 7-8-августундагы Кой-Таштагы окуялары боюнча сот процесстери жүрүп жатат. Ошондой эле Алмазбек Атамбаев 2020-жылдын 9-октябрындагы массалык баш аламандыкты уюштурган иш боюнча айыпталуучу болуп каралууда.
Жогорку Кеңешке шайлоо БШКнын 20-декабрдагы чечими менен өтүшү керек болчу. 24-октябрда административдик сот Борбордук шайлоо комиссиясынын кайрадан шайлоо өткөрүү жөнүндө чечимин жокко чыгарды. Жогорку Сот бул чечимге каршы БШКнын кассациялык арызын кайтарып берди.
Жогорку Кеңеш парламенттик депутаттарды кайра шайлоону конституциялык реформанын аягына чейин, бирок 2021-жылдын 1-июнунан кечиктирбестен кийинкиге калтырган мыйзам кабыл алды.
Президенттин милдетин аткаруучу жана Премьер-министр Садыр Жапаров алгач Жогорку Кеңештин депутаттарын шайлоо 2021-жылдын март айына чейин болот деп билдирген. Бирок кийин ал 2021-жылдын биринчи жарымында болбойт деп айтты.