Жогорку Кеңештин депутаты Рыскелди Момбеков жана анын жан сакчысы таксистти сабоого шектелүүдө. Бул тууралуу бүгүн, 4-сентябрда АКИpress агенттигине өз булактары билдирди.

Алдын ала маалыматка караганда, окуя кечээ, 3-сентябрда «Россия» кинотеатрынын жанында болгон. Чырдын чыгышына айдоочулардын жол талашып кеткени себеп болгон.

Биринчи май РИИБдин басма сөз кызматы бул маалыматты тастыктады.

«Милицияга окуя тууралуу маалымат кечки саат 17:00 чамасында келип түшкөн. Айтылган дарекке кайгуул кызматкерлери барышкан жана «БМВ» унаасынын айдоочусу — 1994-жылы туулган С.И.ни милиция бөлүмүнө алып барышкан. Ал жерде С.И. сабалганын айтып, Рыскелди Момбеков жана анын жан сакчысынын үстүнөн арыз жазган.

Аталган факт Жоруктар жөнүндө кодексинин 119-беренеси (Майда бейбаштык) менен КЖБРга катталды.

С.И.ге соттук-медициналык экспертиза дайындалды. Анын жыйынтыгы менен юридикалык баа берилет», — деп айтылат милициянын маалыматында.