Оштогу резина жумуртка: жабырлануучу кайсы органга кайрылышы керек

Интернетке тараган видеодо жумуртканын сарысы кадимки резинадай чоюлуп жатканын көрүүгө болот.

Кечээ, 17-февраль күнү, интернетте өзүн Ош шаарынын тургунумун деп тааныштарган адам сарысы резинадай чоюлган жумуртканы көрсөтүп жаткан видео тарады.

https://youtube.com/watch?v=RfnRHRIMhSA

Кадрларда көрүнүп тургандай, тургун сууга бышкан жумуртканы аарчып, сарысын баскыласа, ал кадимки резинадай болуп чоюлат.

«Муну биз бүгүн базардан сатып алганбыз. Үйгө келип бышырып жейли десек, жасалма экени билинди. Сарысы кидимки резинадай. Кытайдын жасалма жумурткалары Ошто дагы бар экен, сак болгула, туугандар», — деп айтат видеонун каарманы.

Мындай учурда керектөөчүлөр эмне кылып, мамлекеттик органдар кандай чара көрүшү керектигин билүү үчүн Монополияга каршы жөнгө салуу мамлекеттик агенттигинин алдындагы Керектөөчүлөрдүн укугун коргоо боюнча башкармалыктын башчысы Назина Алыкуловага кайрылдык.Анын айтымында, Керектөөчүлөрдүн укугун коргоо башкармалыгы окуя боюнча иликтөө жүргүзүүсү үчүн жабырлануучу арыз менен кайрылышы зарыл.

«Сатып алган азык-түлүктүн сапаты талапка жооп бербесе, жаран бизге ошол товарды көрсөтүп, арыз менен кайрылат. Биз башка мамлекеттик органдарга кабар беребиз. Мисалы, видеодо жумуртка резина деп айтылып жатат. Анын чындап эле курамы туура эмес экенин санитардык-эпидемиологиялык станция текшерип, далилдеши керек. Андан соң бул товарга сапат сертификаты кантип берилгенин «Кыргызстандарт» ишканасы, өлкө аймагына кантип киргенин Бажы кызматы, аткезчилик менен келген товар болсо Финансы полициясы сыяктуу органдар териштирет», — деп түшүндүрдү Алыкулова.

Ошондой эле башкармалык бул сыяктуу видеолор жалпыга маалымдоо каражаттарына чыккан кезде иликтөөгө алынышы мүмкүн экени кошумчаланды. Болгону ЖМК видеонун автору менен байланышып, анын фейк эмес экенин далилдеп бериши шарт.

Булак: Спутник 

 

Аргумент.kg
Жооп калтыруу