15-июль күнү Арсен сүйүктүүсү Бегайымга баш кошту. Ырчы ага-тууганы менен борбордун четиндеги эс алуу жайында кыргыздын салтына ылайык сүйүктүүсүнө сөйкө салып алып кетти. 3 күндөн кийин 18-июлда эки жаштын үлпөт тою борбордо өтүп, куда-сөөк, ага-тууган, кесиптеш, жоро-жолдош эки жашка бата бердик.
– Арсен, куш боо бек болсун, бактылуу бол!
– Рахмат, айтканыңар келсин.
– Интернетке жүктөлгөн видеодон көрдүк эле, Бегайым кыз узатуу тойдо аябай толкунданды окшойт.
– Ооба, Бегайым толкунданды. Кызын турмушка узатып жаткан ар бир эле ата-эненин, туугандардын ичи ачышат болуш керек. Анын үстүнө ал эки эркектин ортосундагы жалгыз кыз. Динара (ред.: Акулова) эжебиз да «Ай кызым, ай, ай кызым» деп ырдап элди жашытып залга Бегайымды алып кирди. Ал «өйдө карасам эле көзүмө жашып турган туугандарым көрүндү, анан мен дагы ыйлап жиберемби деп кармандым» дейт. Негизи чыгармачыл адамдар эмоционалдуу келишет. Ал эмес мен дагы жашыдым.
– Кыргыздын кулак чоюу, калың берүү деген сыяктуу салттары бар, ал салттардан кыйгап өтпөсөң керек.
– Кыз узатуу тоюнда конокко баргандай эле жүрдүм, кулагыма да эч ким тийишкен жок (күлүп). Калың, сеп берүү деген салттар тууралуу сүйлөшүү болду, бирок мен кийлигишкен жокмун. Эки тарап өздөрүнчө сүйлөшүштү. Мен өзүм үйлөнүү тоюн берем, калганын өзүңөр чечкиле дедим.
– Каяктан таанышып калдыңар?
– Мен негизи кээ бир адамдарга окшоп интернеттин артынан кубалабайм. Бегайым ырымды Инстаграмга жүктөп мени белгилеп коюптур. Сени белгиледи деген билдирүү келсе, мага жазган экен деп ойлоптурмун. Чынын айтсам, ошол убакытта «үйлөнүш керек» деп катуу ойлонуп жаткам. «Чыныгы сүйүү негизи барбы, жок го?» деп сүйүүдөн шекший баштаган учурум эле. Буга чейин сүйүү болду, таарынышуулар да болду дегендей. 30 жашка жакындаган сайын үй-бүлө тууралуу катуу ойлонот экенсиң. Ошентип чыныгы сүйүүнү кайсы жерге барбайын издей баштагам. Интернеттен да карадым, эч ким жакпайт деп коюңуз. Бегайымды билдирүү жөнөттү деп түшүнүп, ага кайра жооп жазып жибердим. Түгөйүм болот деп эч ойлогон эмесмин. Ачык эле «үйлөнөйүн деп кыз издеп жүргөм, жолугуп сүйлөшүп көрөлү. Эгер бири-бирибизге жакпасак таарыныч жок» дедим. Жолукканда дароо жүрөккө жакты. Буга чейин кыздар менен таанышканда ачылып-чачылып, ичиме эч нерсе катчу эмесмин. Бегайым менен жолукканда эмнегедир өзүмдү токтоо кармадым. Өзүн алып жүргөнү, мага жасаган мамилеси, баары жакты.
– Дароо эле «үйлөнүүгө кыз издеп жүргөм» деп айтканың кызык экен…
– Жубайым Бегайым да кийин айтып жатпайбы, мен ошентип жазсам ал «аябай наглый экен» деп таң калып нес абалда калыптыр. Ошентсе да жолугушууга келди.
Бардык эле ырчыларды сыртынан таанып, ырларыбызды укчу экен. Анын арасында мен да бармын деп койбоюнбу. Бирок ырчылар менен бир дасторкондо отурам, ырчыга турмушка чыгам деп эч ойлобоптур.
– Өзү эмне менен алектенет?
– Улуттук университетти быйыл аяктады, кесиби боюнча менеджер. Азыр сулуулук салонунда иштейт. Кыздардын каш-кирпиктерин кооздойт.
– Жубайым деген сөзгө көнүп калдыңбы?
– Жок, жубайым деген сөзгө көнө албай жатам. Азырынча сүйлөшкөн кызымдай эле көрүп жатам. Акырындан көнөбүз да.
– Бегайым экөөңөр интервью бергиле десек, макул болгон жоксуң, ишиңе аралаштырууну туура көрбөйсүңбү?
– Кайын журтум «Бегайымды ишиңе аралаштырбай эле коёсуң го» дешти. Менден бирөө бир нерсе суранса мен аны аткарам. Кайра-кайра айттырууну жаман көрөм. Бул менин кайын журтка болгон сыйым деп ойлойм.
– Той жакшы болду, уюштуруу иштерине өзүң чуркадыңбы?
– Тойдун сценарийин түзгөн да, кем-карчына чуркаган да менеджерим Миргүл Эсеналиева. Канча жылдан бери чогуу иштешип, аны менен бир туугандай эле болуп калдым. Өзүм Бегайымга арнап бир ыр жазгам, досторумдун жардамы менен ага клип тарттык, аны жакында көрөсүздөр. Өзүңөр көргөндөй тойдо «Жар-жар» айтылган жок. «Жаным» деген ырымды атайын тойго арнап жаздыргам, ошону ырдап, жубайым экөөбүз бийлеп, тойду ачып бердик. Чынында тойду Таластагы үйдө ага-туугандын арасында берип, борбордо достор менен эле белгилейли дегем. Ойлонуп көрсөм Таласта той берип, кайра Бишкекте той берип, айтор, ызы-чуусу көп болуп кетет экен. Ошентип 500дөй адамды Бишкекте эле тостук. Менин оюмча, конокторго той жакты. Концертте баарына өзүбүз чуркайбыз да. Ал эми той бергенде жардам бергендер өздөрү келишет экен, билет да сатпайбыз. Мага концерт бергенге караганда той берген жакты.
– Бал айын өткөрүү планыңарда барбы?
– Таласка барып, атамдын үйүндө той беребиз. Атама куран окутуп дегендей. Андан кийин кереметтүү Көлүбүзгө барып бир аптага эс алалы деген пландарыбыз бар.
– Жакшы, эс алууңар көңүлдүү өтсүн.
Эки жашты кесиптештери тегеректеп алып ырдашты, бийлешти, сүрөткө түшүштү.
«Кыз узатуу тоюнда досторум Бегайымды роза менен тосуп алышты».
Булак: Супер Инфо