Бүгүн, 17-июлда Бишкек шаарынын Ленин райондук сотунда Жогорку Кеңештин депутаты Аида Салянованын үстүнөн козголгон кылмыш иши боюнча соттук отурум уланууда.
Күбөлөрдүн тергөөдөгү көрсөтмөлөрү сот тарабынан окулду. Процесс бүгүн түштөн кийин уланат.
Салянова өзү буларды айтты:
«Жалпы 20дай күбө бар. Булардын алтоосу гана сотко келип көрсөтмө беришти. Калгандарынын тергөөдө берген көрсөтмөлөрү окулууда. Бүгүн онго жакын күбөнүн көрсөтмөсү окулду. Айыптоочулар күбөлөрдүн сотко келип «Салянова мыйзамсыз иш жасаган эмес» деп айтып беришине кызыкдар эмес. Бирок сот тарабынан окулган күбөлөрдүн көрсөтмөсүндө деле менин мыйзам бузбаганым белгиленип жатат. Жалгыз мурдагы юстиция министринин орун басары Жылдыз Мамбеталиеванын «Елисеев тууралуу Саляновага эскерткем» деген сөзүн карманып жатышат. Бирок менин аракетимде мыйзам бузуу болгон эмес».
Эскерте кетсек, 2016-жылдын декабрь айында Саляновага «кызматтык абалынан кыянаттык менен пайдалануу» беренеси боюнча кылмыш иши козголгон. Ал «юстиция министри болуп турганда кылмыш жасаганы үчүн издөөдө жүргөн Алексей Елисеевдин адвокаттык лицензиясын узарткан» деп айыпталууда.
Булак: Супер.кж