Президенттик шайлоо өнөктүгүндө Канатбек Исаев бийликтин талапкери Садыр Жапаровду катыра сындап, күрөшчүлдүгүн көрсөткөн. Жеңилсе да намысын таза сактап, саясатчы катары өскөнүн далилдеди. Эң башкысы, көпчүлүк депутат коллегалары “куйруктарын кыпчышып”, кошомат кылып жатышканда алардан айырмаланды. Бийиктигин байкадык, келечек жолуна арканын алыс ыргытып койду. Ошого катар интеллектуалдык деңгээли, тажрыйбасы жогору экенине ынандык. Канатбек Исаев улуттун кызыкчылыгы үчүн күрөшкөн мамлекетчил инсан экени акырындык менен тастыкталууда. Ал мындан ары негизги оппозиционер катары туруктуулугун көрсөтүп, элдин кызыкчылыгына карай күрөшө берери айкын. Барган сайын коомчулук бийликтин катачылыктарына иренжий берери, акыры Исаевдин изгилигине, көч баштай турган жөндөмүнө ишеним артышары турган иш. Анүчүн убакыт керек, элибиз да тандоону туура жасай турган мезгилге баратат. Буюрса, алдыда далай саясый күрөштөр бар…
«Азия Ньюс» гезити