Саламаттыкты сактоо жана социалдык өнүктүрүү министри Алымкадыр Бейшеналиева 4-шаардык ооруканада эмдөө алгандан кийин токсикология бөлүмүндө каза болгон 46 жаштагы Назгүл Исакованын өлүмүнүн себебин жарыялады.
Министр “Биринчи радионун” эфиринде билдиргендей, экспертиза Исакова вакцинаны алганга чейин коронавирус менен ооруганын далилдеди. «Пневмония менен ооруган, өтүшүп кеткенден кийин COVID-19дан көз жумган», — деди ал.
Эске салсак, 46 жаштагы Назгүл Исакова Кара-Көл шаарынан келген. Ал “Спутник V” вакцинасын Бишкектеги №1 Үй-бүлөлүк дарыгерлер борборунан алган.
Туугандарынын айтымында, Назгүл Исакова коронавируска каршы “Спутик V” вакцинасын алгандан кийин каза болгон. Маркум “Спутник V” вакцинасынын биринчи дозасын 19-июлда алгандан кийин дене табы көтөрүлгөн. «Ал эки күн төшөктө жатып, кан басымы 30га түшүп кетти. “Тез жардам” кызматы менен 4-шаардык оорукананын токсикология бөлүмүнө жаткырылган, 22 -июлда эртең менен каза болгон. Учурда экспертиза жүрүп жатат», — дешет алар.
Ал эми 4-шаардык оорукананын башкы дарыгеринин орун басары Бакыт Исаковдун айтымында, Назгүл Исакова токсикология бөлүмүнө аллергиялык реакция менен жаткырылган.
Ленин районунун Биргелешкен үй-бүлөлүк медицина борбору директорунун орун басары Чоро Сатаев эмдөөдөн мурун ар бир пунктта жарандардан сурамжылоо жүргүзүлөрүн айтты. “Назгүл Исакова дагы анкета толтуруп, дарыгерлер ага тиешелүү суроолорду беришип, кан басымын өлчөшкөн. Ал өзү анкетага кол коюп, эмдөөгө макул болгон. Вакцинаны алган учурда баары жайында болгон. Дарыгерлердин айтымында, анын абалы канааттандырарлык болчу», — дейт ал.
Республикалык соттук-медициналык экспертиза борборунда ПЦР анализи эки ирет алынган. “Исакова 4-шаардык ооруканага келгенде, алар андан ПЦР тестин алышканда ал коронавирус үчүн терс натыйжаны көрсөткөн. Бирок экспертиза учурунда өпкөдөн вирус табылды”, — деп билдирет Республикалык соттук-медициналык экспертиза борборунун директорунун орун басары Эрнис Акунов.