Кыргызстандын Социалдык фонду пенсиянын минималдуу өлчөмүн 3170 сом өлчөмүндө аныктоону пландоодо. Бул тууралуу Жогорку Кеңештин Социалдык саясат боюнча комитетинин жыйынында аталган бөлүмдүн башчысы Бактияр Алиев билдирди.
Анын айтымында, «Мамлекеттик пенсиялык социалдык камсыздандыруу жөнүндө» мыйзамга өзгөртүүлөр кабыл алынса, пенсия 70 пайыздан 260 пайызга чейин көтөрүлөт. Бул үчүн 4 миллиард сом керектелет.
«Биз пенсиянын минималдуу өлчөмүн 3170 сом өлчөмүндө аныктоону сунуштап жатабыз. Өзгөртүүлөр кабыл алынса, 53 миң пенсионердин пенсиясы жогорулайт», — деди ал.
Бактияр Алиевдин айтымында, бүгүнкү күндө 745 миң пенсионер бар. «Ошондой эле пенсияларды каттоону жөнөкөйлөтүп жатабыз. Эми паспорт болсо жетиштүү», — деп кошумчалады Соцфонддун жетекчиси.
Мындан тышкары пенсияны мөөнөтүнөн мурда каттоого тыюу салуу сунушталууда. «Бир жылда 55 миң пенсионер мөөнөтүнөн мурда пенсияга чыкса, анын 90 пайызы эмгек акы жана пенсия алган мамлекеттик кызматкерлер», — деп жооп берди ал.
Булак :Аргумент. кж