Бүгүн, 2-ноябрда камактагы саясатчы Равшан Жээнбеков аны сотко күч менен алып келишкенин билдирди. Кой-Таш окуясы боюнча ишти Бишкектин Биринчи Май соту карап жатат.
Равшан Жээнбеков Акыйкатчыга, эл аралык уюмдарга жана Кыйноолорду алдын алуу боюнча улуттук борборго кайрылды.
Кайрылууда Равшан Жээнбеков камерадан күч менен чыгарылганын билдирди.
«Урматтуу сот, мен сизге кайрылам. Мен бешинчи күндөн бери ооруп жатам, дарыгерлер төшөктө эс алуу керек дешет. Бирок эки күндө бир жолу сот процесстери болуп жаткандыктан, майнап чыкпай жатат. Мен чыйрыгып, тамагым ооруп жатат. 1-СИЗОнун медициналык бөлүмүнө арыз жаздым, бирок жардам бергендин ордуна мени мажбурлап сотко алып келишти. Урматтуу сот, менин бир өтүнүчүм бар – мага 2-3 күн эс алып, кадимки адамдай сотко келүүгө мүмкүнчүлүк бериңиз. Конституция жана эл аралык нормалар ооруп калуума, медициналык жардам алууга уруксат берет, бирок ал каралган эмес», — деди ал.
Жээнбеков айыгып кеткенден кийин сотко үзгүлтүксүз катышып турууга убада берди.
Бирок судья анын кайрылуусун канааттандырган жок.