Акыйкатчы Атыр Абдрахматова Бишкектин Биринчи Май райондук прокуратурасынан мыйзамдын талабын аткарып, Башкы прокуратуранын күйүп кеткен имаратында жашы жете элек кыздын зордукталышын иликтеп жаткан тергөөчүнүн аракетине баа берүүнү талап кылууда. Бул тууралуу бүгүн, 6-мартта Акыйкатчынын катчылыгы билдиргенин жергиликтүү басылмалардын бири жазып чыыкты.
Буга чейин кыздын чоң атасы, Аламүдүн районунун тургуну Б.М., акыйкатчыга кайрылып, ал 2021-жылдын август айында Алтынбек аттуу жаран TikTok социалдык тармагына видео тартуу шылтоосу менен небересин прокуратуранын мурунку имаратына чакырып, бир нече жолу зордуктаганын билдирген. Чоң атасынын айтымында, натыйжада кыз боюна бүтүп, 2022-жылы уул төрөгөн. 2021-жылдын 23-ноябрында кыздын чоң атасы Биринчи Май райондук ички иштер башкармалыгына кайрылып, анын арызынын негизинде КР Кылмыш-жаза кодексинин 161-беренесине ылайык кылмыш иши козголгон.
Бирок, Биринчи Май РИИБнин тергөөчүсү А.Э., баланын аталыгын аныктоо үчүн ДНК экспертизасына таянып, ишти кайра 2022-жылы токтоткон. Ошол эле учурда бала бир жашка чыкканда гана ДНК анализи тапшыруу дайындалган. Жабырлануучу тарап тергөөчүнүн чечими менен нааразы болгонуна карабай, кылмыш иши кайра козголгон эмес.
Азыр баланы кыздын чоң энеси тарбиялап жатат. Зордук-зомбулуктан кийин жабырлануучу мектепке бара албайт.
Кыздын чоң атасынын айтымында, бир жылдан кийин тергөөчү талап кылгандай, Орусияда аталыкты аныктоочу ДНК анализи жүргүзүлгөн. Баланын атасы Алтынбек экени аныкталган. Бирок, ага карабастан, тергөөчү А.Э негизсиз дагы бир жолу Казактсандан 600 долларга ДНК аталык анализин өткөрүүнү талап кылган.
Акыйкатчынын катчылыгы кош бойлуулуктун эрте мезгилинде да баланын аталыгын аныктоонун заманбап жолдору бар экенин белгилейт.
Ошол убакта 13 жаштагы кызды зордуктоого шектелген адам кармала элек. Ал эркиндикте жүргөнүнө эки жылдан ашты.
Буга байланыштуу Акыйкатчы институту Биринчи Май РИИБдин тергөөчүсүнүн аракеттерине укуктук баа берүү, ошондой эле анын кошумча ДНК тестин өткөрүүнү талап кылгандыгынын мыйзамдуулугун текшерүү өтүнүчү менен Биринчи Май райондук прокуратурасына кайрылган.