Бүгүн Жогорку Кеңештин жыйынында депутат Акбөкөн Таштанбеков Ысык-Ата районундагы мектептер, мектеп тилкелери жана бала бакчалар сатылып жатканын билдирди.
Анын айтымында, ал жер ресурстары кызматына мектеп жана бала бакчалардын ээлери тууралуу маалымат берүү өтүнүчү менен кайрылган. Бирок мындай маалымат менчик ээлеринин өздөрүнө гана бериле тургандыгын айтып, департамент депутатка жооп берүүдөн баш тарткан.
«Кантта Маданият паркынын бир бөлүгү Лесхозго сатылып, ага чейин Эмен паркы деп аталып калган. Бала бакчалар, мектеп, ФАП, райондук акимчиликтин имараты, мектептин жанындагы жер тилкеси кошумча имараттары менен сатылып кеткен. Прокуратурага кат жаздым, көзөмөл органы мыйзам бузулду, бирок эскирүү мөөнөтү өтүп кетти деп жооп берди. Көрсө, бул эскирүү мөөнөтү бийликтеги адамдарга гана тиешелүү болуп, карапайым жарандарга иштебейт экен», — дейт Акбөкөн Таштанбеков.
Ал белгилегендей, коррупцияга аралашкан адамдар Айыл чарба министрлигинин башчысынын орун басарлыгына, ал эми милициядан терс себептер менен бошотулган адам айыл өкмөткө дайындалып жатат.