Сооронбай Жээнбеков жакында камалабы?

Башкы прокуратурага экс-президент Сооронбай Жээнбековго жана анын иниси, Жогорку Кеңештин депутаты Асылбек Жээнбековго каршы арыз түштү. Мекеменин басма сөз кызматы тараткан маалыматка караганда, арызды Ош облусунун ички иштер башкармалыгынын мурдагы жетекчиси Абдилат Капаров жазган.

Капаров Жээнбековдорду шалаакылыкка жана акча ыйгарып алууга айыптап, жарандардын массалык түрдө вирус жуктурганына мурдагы президент жоопкер деп эсептейт.

«Бир тууган Жээнбековдордун сыртка чыгуусуна тыюу салып, мүлкүн камакка алуу менен ишмердүүлүгүн тыкыр иликтөөнү суранам. Тергөөнүн жыйынтыгы менен Сооронбай Жээнбековду «экс-президент» макамынан жана атайын пенсиядан ажыратууну өтүнөм», — деп кайрылган Капаров.

Башкы прокуратура Капаровдун арызы каралып жатканын маалымдады. Бирок кайсыл стадияда каралып жатканын тактай алган жок.

Капаров ушундай эле арыз менен президентке жана Улуттук коопсуздук боюнча мамлекеттик комитетке да кайрылганын «Азаттыкка» маалымдады.

Ал Жээнбековдорго карата кылдат териштирүү жүргүзүүнү, аларды өлкөдөн чыгарбоону жана мүлкүн камакка коюуну, мурдагы мамлекет башчыны экс-президент деген макамдан, атайын пенсиядан ажыратууну суранды.

Өзүн Жээнбековдордун тушунда саясий себеп менен негизсиз репрессияга кабылганын айткан Капаров Сооронбай Жээнбековду 2020-жылдын

Өзүн Жээнбековдордун тушунда саясий себеп менен негизсиз репрессияга кабылганын айткан Капаров Сооронбай Жээнбековду 2020-жылдын октябрь, 2010-жылдын май-июнь окуялары, Мамлекеттик бажы кызматынын башчысынын мурдагы орун басары Райымбек Матраимовду калкалаганы жана коронавирус эпидемиясы учурундагы абал үчүн айыптады. Ал эми Асылбек Жээнбековду Бишкектин Жылуулук электр борборун реконструкциялоо боюнча келишимге байланыштуу күнөөлөдү.

Капаров 2010-жылы коогалаң учурунда Ош облустук милициясын жетектеген. Ал кезде Сооронбай Жээнбеков Оштун губернатору болуп турган. Кийин ал «июнь окуяларында Сооронбай жана Асылбек Жээнбековдор 3 миллион доллар уурдашкан» деп айтып чыккан. Бул билдирүүнү курулай доомат деп эсептеген Сооронбай Жээнбеков анын кадыр-баркына шек келтиргенин айтып, Капаровду сотко берген. Капаров беш жылга созулган соттошуудан кийин 2017-жылы камалып, Ош облустук сотунун чечими менен төрт жылга соттолгон жана быйыл октябрь окуяларынан кийин түрмөдөн чыккан.

Эркиндикке чыккандан кийин Капаров Жогорку сотко облустук соттун чечимине каршы арызданган.

Жогорку сот Жээнбековдорду бул соттук жараянга чакыруу жөнүндөгү өтүнүчтү канааттандырып, кийинки отурумду 12-январга белгилеген.

Жээнбековдор бул боюнча өзүлөрү комментарий берише элек. Жогорку сотто алардын кызыкчылыгын коргогон жактоочу Советбек Закиров азырынча комментарий бере албай турганын, бир нече күндөн соң кагаз жүзүндө жооп берерин «Азаттыкка» айткан. Ал 18-декабрда: «Азыр эч нерсе деп айта албайм. Жазуу түрүндө жооп жазып берели. Кийин сөзсүз жооп беребиз», — деп билдирген.


Сиздин пикир