Кызматтык иликтөөнүн жыйынтыгында милиция кызматкери тарабынан да, прокуратура кызматкерлери тарабынан да мыйзамсыз иш-аракеттер орун алганы аныкталган. Бул тууралуу маалымат Башкы прокуратуранын расмий сайтына жарыяланды.
2018-жылы 23-декабрда Балыкчы шаарында шаардык прокуратура кызматкерлери жол күзөт кызматынын кызматкери менен мушташып, милициянын сержанты шаардык ооруканага жаткырылган.
Окуя болгон күнү Кылмыш-жаза кодексинин 305-беренесине («Кызматтык укуктарынан аша чабуу») ылайык кылмыш иши козголгон. Азыр иш Ысык-Көл облусунун УКМК бөлүмүнө өткөрүлүп, иликтене баштады.
Башкы прокурордун буйругу менен бул окуяга байланыштуу Балыкчы шаарынын прокурору, анын жардамчысы жана стажеру кызматтан алынган.
Булак: Азаттык