Түркиянын Кыргызстандагы элчилиги Бишкекте жайгашкан түрк башталгыч мектебине байланыштуу ЖМКга жана социалдык тармактарга чыккан дооматтар тууралуу 22-февралда билдирүү таратты.
“Бул маселе боюнча ыкчам түрдө иликтөө иштери башталып, окуу жайдын мүдүрү жана орун басарлары кызматынан четтетилип, алардын ордуна убактылуу жаңы жетекчилер дайындалды. Түркиядан келе турган инспекторлор зарыл болгон текшерүү иштерин алып барат. Мындан тышкары, бул маселе боюнча Кыргызстандын тиешелүү органдары менен тыгыз кызматташтык жүрүп жатат. Керектүү бардык маалыматтар, документтер берилди жана көмөк көрсөтүлүүдө”, — деп жазылган ал билдирүүдө.
Кечээ, 21-февралда депутат Ирина Карамушкина Жогорку Кенештин отурумунда Бишкектин Жал кичирайонундагы түрк башталгыч мектебинин жетекчилигин ыдык көрсөтүүгө айыптаган. Эл өкүлү ага ата-энелер даттанганын, директор окуучуларды иш бөлмөсүнө алып кирип, сексуалдык аракеттерди жасаганын айткан.
Карамушкина Кыргыз-түрк “Манас” университетинин короосунда жайгашкан бул мектеп лицензия албай иштеп жатканын жарыялаган. Анын айтымында, соңку фактка байланыштуу ИИМ менен УКМК тергөө иштерин алып барууда.
Аталган эки орган жана Билим берүү министрлиги бул жагдайга байланыштуу комментарий бере элек.